EGIPTE is ’n land in die noordooste van Afrika. Wanneer ons oor antieke Egipte praat, verwys ons na die Egiptiese beskawing wat meer as 3 000 jaar (van 3150 v.C. tot 30 v.C.) een van die magtigste en stabielste beskawings in die geskiedenis van die wêreld was. So vroeg as 6000 v.C. het mense hulle in klein nedersettings in Egipte gevestig. Mettertyd het hierdie nedersettings in twee streke saamgesmelt: Benede-Egipte in die noorde en Bo-Egipte in die suide. Omstreeks 3100 v.C. is hierdie streke deur koning Narmer verenig.
Geskiedkundiges verdeel Egipte se lang geskiedenis in drie periodes. Dit is die tye van die Ou, Middel-en Nuwe Koninkryk.