Suiwel
Met melkboerderye wat toenemend onder druk is, moet die oorblywende melkerye hulself differensieer. En met koffiedrink wat eintlik in ’n wetenskap omskep is en “kunswerke” wat op dik, borrelende skuim in koffie geskep en op sosiale media vertoon word, het Christo en Marlene Klingenberg van die plaas Zaaiplaats by Mkhondo ’n aar raakgeboor met die voorsiening van vars melk en room aan ’n maatskappy. Die melk pronk uiteindelik in gesogte drankies van spesialiskoffiewinkels in Gauteng.
Volgens die Amerikaanse spesialis-koffietoerustingmaatskappy Urnex “is daar bitter min kulinêre duo’s wat meer dinamies is as koffie en melk. Melk is dikwels ’n afgeskeepte aspek van die skep van ’n heerlike koffiebrousel. Maar vir lattes, cappuccino’s en ’n reeks ander melkagtige koffiedrankies is melk dikwels meer as die helfte van die drankie. Waar melk vandaan kom en die chemiese inhoud, geur en tekstuur daarvan is alles belangrik vir die gehalte van ’n koffiedrankie.”
Volgens die Klingenbergs is hul Jerseys se melk vinnig en maklik skuimbaar, net soos die koffiewinkels se baristas dit vereis. “En nee, nie sommer enige vars melk het hierdie eienskap nie.”
Zaaiplaats se melkkudde is al in die 1950’s gevestig toe wyle Christian Klingenberg grotendeels met skape, vleisbeeste en ’n bietjie gesaaides geboer het. Daar was ook die bekende Zaaiplaats Afrikanerstoetery. Hulle het die stoetery in 1994 verkoop en