ALLES was rustig op die beesplaas in die Dealesville-distrik daardie Sondagoggend van 3 September. Toe, om en by 12:30, lui die foon en alles verander.
Steyn Lombard se brein kon nie verwerk wat hy hoor nie. Nee, nee, dit kan nie wees nie, is al wat die geskokte Vrystater kon dink.
Want net gister het hy nog lekker oor die foon gesels met sy swanger dogter, Marioné van Deventer (25), wat in die Reitz-distrik woon.
“Sussie, hoe gaan dit?” het hy haar gevra.
“Goed, Pappa,” het sy geantwoord. “Met my en die baba gaan dit sommer baie goed!”
Nou vertel die stem in die gehoorstuk hom dat sy dogter en sy ongebore kleinkind in ’n verskriklike motorongeluk was …
Hy gryp die voertuigsleutels en roep sy vrou, Mariëtte,