KUBERKUIER
Hoekom Kanada?
Ek en my man, Errol, is in Junie 1999 na Kanada, ’n pasgetroude jong paartjie wat saam op soek was na ’n avontuur voordat ons vasgevang word deur “die lewe”. Dit was egter meer as net ’n reisgogga, ons wou ook die werkslewe in die buiteland ervaar. Ons het lande soos Australië, Nieu-Seeland, Engeland en die VSA oorweeg en uiteindelik op Kanada besluit. Ná 25 jaar hier herinner ons onsself nog gereeld hoe bevoorreg ons is om in so ’n pragtige land te woon, omring deur verwelkomende mense. Ons was albei ingenieurs in die petroleum- en mynwesebedryf, nou doen Errol produkbemarking en ek werk met strategiese kapitaalprojekte.
Waarvoor is Kanada bekend?
Politieke en ekonomiese stabiliteit, ’n skoon en veilige omgewing en oor die algemeen ’n hoë lewenstandaard vir almal. Onderwys is uitstekend en ons het albei die Kanadese universiteitslewe ervaar toe ons ekstra kursusse geloop het. Die openbare gesondheidstelsel word wêreldwyd as een van die bestes beskou – en dis heerlik om Afrikaans te praat met dokters en tandartse!
Kanadese is ook trots op hul inklusiwiteit.
