SY GESIG is oop en skoongeskeer, met bietjies grys net-net sigbaar teen sy slape. Hy lyk ontspanne, dié aantreklike man in sy swart T-hemp.
Maar Stephen McGown lyk ook na ’n heel ander mens as ’n paar jaar gelede. Destyds het hy ’n lang kleed gedra. Sy hare en baard was lank, soos dié van ’n profeet uit die Ou Testament.
Toe het hy ook anders gelyk as die man wat hy eens was – anders as die man wat sy geliefdes vóór sy verdwyning geken het.
Vandag – al is hy heelwat ouer – lyk hy weer soos die man van lank gelede, soos die Stephen van die jare voor sy lang pad deur die woestyn.
En dis nie net sy uiterlike wat soos handomkeer verander het nie.
Stephen is deesdae ’n skrywer wat die wêreld vol toer om sy nuwe boek te bemark. Maar ’n dekade gelede, van 2011 tot 2017, was hy ’n gyselaar van die gevreesde terreurgroep Al-Kaïda in Noord-Afrika.
Stephen, ’n Suid-Afrikaner wat in Johannesburg grootgeword het, het ’n onbenydenswaardige rekord agter sy naam: Hy was die mens wat die langste ooit as gyselaar deur Al-Kaïda aangehou is en lewend anderkant uitgekom het. ’n Volle ses jaar lank was hy ’n gyselaar.
In November 2011 was hy van Londen, waar hy toe gewerk het, deur Afrika op pad na Johannesburg, sy grootwordstad, waar hy hom sou vestig om ’n nuwe lewe te begin saam met sy vrou, Catherine, met wie hy toe
