DIE wildvreemde man op die foon noem haar “babe”.
“Skeer jy nou die gek met my?” Sy’s reg om dood te druk.
“Dis ek, babe,” sê die man weer. “Dis regtig ek.”
Ses jaar lank het Shereen van Deventer gewonder hoe haar man, Gerco, se stem nou klink. Hoe hy lyk. Of hy oukei is. Of hy lewe.
“Dis regtig ek.”
Gerco het einde Oktober 2017 in Libië gaan werk as ’n paramedikus.
Die egpaar was deeglik bewus van die gevaar. Hy het immers al vroeër in Afghanistan gewerk en Shereen toe al vertel van die gevaar dat hy ontvoer kan word.
Libië was destyds in die greep van ’n burgeroorlog, maar werk is werk. Dae later, op 3 November, is Gerco deur militante ontvoer op pad na sy werk by ’n kragsentrale diep in die binneland.
Die vorige dag het hy nog vir Shereen gebel om te vertel hy gaan na die kragstasie toe. Alles was wel.
Toe die foon die volgende dag lui, was die nuus uit die bloute uit. “Hulle het gevra of ek
