VRA hom oor boeremusiek en jy begin verstaan hoe die hele geneuk kon begin het. Want as Willem Viljoen eers begin praat oor die musiek waarvoor hy so lief is, sukkel hy om stil te bly. Hy het báie om te sê.
Dit was immers die klanke waarmee hy grootgeword het – dis vir hom deel van sy eie geskiedenis, en ook die geskiedenis van sy kultuur.
Willem is die seun van die musiekikoon Ollie Viljoen, die legendariese “oom Ollie” wat sulke groot voetspore in die wêreld van boeremusiek getrap het. Maar hy is ook die aanbieder van die radiostasie RSG se program oor boeremusiek – en dís waar die klanke van die konsertinas onlangs ’n kakofonie van onmin veroorsaak het.
Willem het op die lug gesê hy word “gemuilband” en sal voortaan minder staaltjies en stories oor boeremusiek vertel, en dan nou maar eerder nét musiek speel nadat daar glo klagtes oor al sy praatjies was.