Middellynkruising – of soos sommige terapeute kortweg sê ”midlynkruising” – is ’n term wat jy nog baie op jou kleinding se grootwordpad gaan hoor by sy juffrou, sportafrigter, terapeut en selfs by speelgoedbemarkers. Maar wat beteken hierdie gonswoord en hoe raak dit jou kind?
Daar is baie wat jy kan doen om seker te maak jou baba en peuter bereik hul middellynkruising-mylpale. Dis een van die belangrike boublokkies van vaardighede wat jou kind moet baasraak om gereed vir die grootskool te wees.
WAT IS MIDDELLYNKRUISING?
Die menslike liggaam word in ’n linker- en regterkant verdeel deur ’n denkbeeldige middellyn wat strek van jou kroontjie, deur jou neus tot tussen jou voete, verduidelik Amy Rode, ’n arbeidsterapeut van Stellenbosch. ”Middellynkruising is die oorsteek van hierdie denkbeeldige lyn.” Amy beklemtoon dat middellynkruising slegs plaasvind wanneer rotasie van die skouergordel oor die heupgordel plaasvind en nie soos baie mense dink as jy jou arm effens oorsteek na die ander kant toe nie.
Elrie Maree, ’n arbeidsterapeut van Port Elizabeth, sê middellynkruising is ook die vermoë om die oog, hand of voet aan die een kant van die liggaam in die ruimte van die ander oog, hand en voet te gebruik. Maar ons lyf bestaan eintlik uit drie verskillende middellyne wat alles belangrik is vir baba se ontwikkeling, sê sy: die sagitale, transverse en frontale middellyn.
DIE BELANGRIKE BASIS
Middellynkruising is met rede ’n gonswoord: Dis geweldig belangrik vir jou kleinding. Dit bewerkstellig en beïnvloed meer as een