OOSTERSE SLAAI
GENOEG VIR 4 MENSE / BEREIDING: 20 MIN. / GAARMAAK: SOWAT 7 MIN.
Kikker ’n verskeidenheid groenigheid op met repies pynappel, avokado, gesoute neute en noedels.
SLAAISOUS
◗ 80 ml (⅓ k) soesji-ryswynasyn
◗ 30 ml (2 e) balsemieke asyn, bosbessiegeur
◗ 60 ml (¼ k) kanolaolie
◗ 15 ml (1 e) sesamolie (opsioneel)
◗ 5 ml (1 t) sagte bruinsuiker
SLAAI
◗ 250 g soba-noedels, volkoring-Chinese noedels of eiernoedels
◗ 150 g groen blare soos bronkors, babaspinasie en roket
◗ 1 Libanese komkommer, in skyfies gesny
◗ 1 avokado, in repies gesny
◗ ’n halwe pynappel, in stokkies gesny
◗ 4 hande vol vars kruie soos koljander, ment en basilie
◗ 4 stingeluie, in dun ringe gesny
◗ ’n groot hand vol geroosterde gesoute gemengde neute (amandels, pekanneute, kasjoeneute, Brasiliaanse neute)
Klits al die bestanddele goed saam. Kook die noedels volgens die aanwysings tot net gaar, dreineer en plaas in ’n slaaibak. Giet ’n bietjie van die slaaisous oor en laat afkoel. Voeg die blare by die noedels en rangskik die komkommer, avokado en pynappel Sprinkel die kruie, stingeluie en neute oor en sit voor.