Lea en André se woonstel in Kaapstad is tans ’n “ontploffing van bubble wrap”. En hul emosies is nie ver agter nie. Lea som dit só op: “Opwinding, antisipasie en ongeloof vibreer in elke sel van ons liggame!”
Dis twee en ’n half weke voor die paartjie sak en pak na Portugal verhuis – trouens, ses sakke van 23 kilogram elk tussen die twee van hulle. Die einde van ’n “beplanningsmarathon van 18 maande” en die begin van hul nuwe avontuur.
“Ek weet ek gaan my nog sát huil, dit sal seker eers insink wanneer ons almal finaal groet. Maar dis ook ’n droom wat realiseer,” sê Lea, ’n smoothie in die hand – een van haar gunstelingdrankies by The Ladder, net ’n entjie van hul blyplek in Waalstraat.
Lea het reeds ’n stappie met ’n vriendin agter die blad. In haar oefenklere lyk sy nog skraler en kleiner as op TV. Dis van so baie Pilates doen, sê sy.