t – teelepel/s e – eetlepel/s k – koppie/s
SJOKOLADE-&-DADEL-FUDGE
LEWER 24-26 KLEIN BLOKKIES / BEREIDING: 20 MIN. GAARMAAK: 5 MIN. / STAAN: 30 MIN. VERKOEL: 3-4 UUR OF OORNAG
◗ 250 g dadels, grofgekap
◗ 30 ml (2 e) botter of margarien
◗ 100 g donkersjokolade, grofgekap
◗ 15 ml (1 e) heuning
◗ 15 ml (1 e) grondboontjiebotter, tahini of klapperolie
◗ 15 ml (1 e) kakao
◗ 5 ml (1 t) vanieljegeursel
◗ ’n knippie seesout
AFRONDING
◗ kakao (opsioneel)
Voer ’n vierkantige 20 cm-bak met bakpapier of foelie uit, en bespuit goed met kossproei.
Sit die dadels in ’n bakkie en bedek met kookwater. Laat staan 30 min. Sit die botter of margarien en die sjokolade in ’n kastrol en verhit oor lae hitte. Roer aanhoudend tot die sjokolade gesmelt is. Voeg die heuning en grondboontjiebotter, tahini of klapperolie by. Meng goed en verwyder van die hitte. Dreineer die dadels en plaas dit in ’n voedselverwerkerbak. Pols rofweg. Voeg by die sjokolademengsel. Voeg die kakao, vanielje en sout by, en klits deeglik. Skep die mengsel in die bereide bak. Smeer die mengsel eweredig, maak glad bo-op en laat 3-4 uur of oornag in die yskas stol. Keer die fudge versigtig uit, sif die kakao oor indien gebruik, en sny met ’n skerp mes in klein blokkies. Bêre tot 2 weke lank in ’n lugdigte houer