DIS nie ongewoon om ’n reus met bultende boarms en breë skouers te sien nie. Maar in die verbyloop, registreer iets by jou – hy lyk effens bekend, soos ’n ou vriend wat jy jare laas gesien het maar van wie jy nog nie vergeet het nie.
Dan val dit jou by. Dis Granite, die kryger van MTN Gladiators, wat ons destyds vasgenael voor die kassie gehou het terwyl hy met sy permanente frons die deelnemers harde klippe laat kou het.
Dis 24 jaar sedert die reeks tussen 1999 en 2001 uitgesaai is, maar Garth Collins, die man agter Granite, lyk nog nes destyds: groot, gebeitel en – op 56 jaar oud – asof hy jou soos ’n sosatiestokkie in twee sal kan breek.
