‘DIS SEAN SE EGTHEID WAT MY AANTREK. EK HET ’N JUWEEL ONTDEK’
HOE gebeur dit dat jy handeviervoet rondkruip op ’n sneltrein in Parys? Saam met jou verloofde? Op Oujaarsaand?
Dié gesig van ’n aantreklike donkerkopman wat op die vloer van ’n treinwa rondtas terwyl sy ewe mooi geliefde magteloos toekyk, was waarskynlik vir talle passasiers nogal vreemd.
Vir die akteurs Armand Aucamp en Sean van Noordwyk was dit die eerste uitdaging as verloofdes nadat Sean vroeër die aand onder die liggies van die Eiffeltoring vir Armand gevra het om te trou.
“Openbare vervoer was gratis op Nuwejaar, en die trein was geweldig vol,” verduidelik Armand nou. “Met die skielike stop-ry-beweging het die ring van my vinger afgeglip. Ek was so ontsteld.”
Sean vertel Armand kon glad nie die swart titaanring vind nie, al het hy handeviervoet op die vloer neergesak. “Ek het later vir hom gesê: ‘Armand, dit is net ’n ring. Ek kan vir jou ’n ander een koop. Ek weet mos jy het