‘TRRR! Trrr!” lui die groot televisieskerm in die Babbelboomhuis. Bibi druk die knoppie om die videoboodskap te speel. Sy en haar maats Paloeka die leeu en Palawa die kameelperd wag al heeloggend vir die vraag van die dag.
“Hallo, Babbelbende, ek wil weet hoekom koop ’n mense alles met geld?” vra die seuntjie op die skerm.
“Wat ’n uitmuntende vraag,” roep Palawa opgewonde uit.
Paloeka lag. “Uit-munt-end. Munt. Geld. Skerp, Palawa,” sê hy.
“Ek het daai een glad nie beplan nie, maar dankie, Paloeka,” sê Palawa met ’n glimlag.
“Wag ’n bietjie,” sê Paloeka en krap sy maanhare deurmekaar. Hy kyk rond en loop boekrak toe.
“Ek wonder nou, wat op aarde het van ons spaarvarkie geword?