Die swaarkry van die uitmergelende droogte wat maar onlangs deur goeie reën gebreek is, sit nog vlak, soos ’n slegte nasmaak, in Franchwa Batt se geheue. Die droogte het hom en sy vrou, Chrismari van der Westhuizen-Batt, geleer met hoe min ’n mens kan klaarkom.
“Dit het my ook laat besef dat ’n mens nooit te trots moet wees om hulp te vra nie, en jy moet altyd na jou bure kyk in tye van nood. Jou buurman se nood is dalk net groter as joune. Dit het my ook laat besef dat daar meer mense is wat omgee as wat jy besef.”
Hulle het ook geleer dat ’n boer in die Boesmanland in die goeie tye baie beter vir die slegte tye moet voorberei.
Dié Meatmaster-boer van Loeriesfontein, met opleiding en werkondervinding in die rekenaarbedryf, het by sy skoonpa, Josias van der Westhuizen, kom leer boer.
“Ons boer meestal ekstensief hier in die Boesmanland. Die belangrikste les is om nie jou kampe te oorbewei nie en om die veld reg te lees. Dit beteken jy moet jou veld noukeurig bestudeer om seker te maak oorbeweiding vind nie plaas nie.”
Dié les
