AMELIA hou haar kamera gereed en beweeg ál verder weg van haar voertuig, op die uitkyk vir die perfekte wildfoto. Sy het al naam vir haarself gemaak in Suid-Afrika sowel as oorsee omdat sy die gawe en geduld het om diere op net die regte dramatiese oomblik vas te vang.
Sy ry alleen uit, sonder ’n wildbewaarder by, en is nou in die hartjie van die Thula Thula-reservaat, seker die enigste mens soveel kilometers van die naaste kamp af. Sy het al uitgery toe die son netnet oor die bome loer en die gras nog nat is van die dou. Om haar sing voëls en skree insekte, maar sy spits haar ore vir die harder geluide van groot diere.
“Jy is te roekeloos,” vermaan haar pa altyd wanneer sy stories vertel van waar sy oral loop, inkruip en wegkruip om die perfekte foto te kry.
Nou ja, wie nie waag nie, wen nie. Haar pa kry die piep as