Die skok het nog deur haar binneste gerittel toe die aktrise Vinette Ebrahim op 29 Maart vanjaar die hartverskeurende nuus op Facebook aankondig: “You’re on your way to FREEDOMBURG my partner, my friend for almost half my life! No matter how rough the ride, the end was filled with love. Rest in peace, Ivan D. Lucas. May flights of Angels sing thee to thy rest.”
Daar wás steeds ongeloof terwyl die aktrise gesit en tik het, nes vir diegene wat haar skrywe sou lees. Vir Vinette (66) het dit kompleet gevoel of iemand haar binneste uitgeruk het. Alles was só gou verby. En ’n liefdesverhaal van langer as drie dekades is tot stilstand geruk…
“Letterlik binne ’n dag. Ivan is Maandag 27 Maart gediagnoseer met leweren pankreaskanker en Dinsdag toe is hy weg.” Tot dié Maandag het nie een van hulle eens geweet hy’t kanker nie.
Trouens, vandag wroeg Vinette juis met daai einste ding. “Het Ivan geweet dat hy gaan doodgaan? Het hy geweet hoe siek hy eintlik was? As ek nou terugdink aan ons laaste gesprek by sy hospitaalbed, het hy vreedsaam gelyk. En selfs ná sy dood, het hy daar gelê en rustig gelyk. Handsome. Asof die wêreld se laste van sy skouers af is.”
'HY HET NOOIT GEKLA'
Voor vandag het sy eintlik lanklaas gehuil, maar dis trane van blydskap en hartseer, sê Vinette dan. “Ivan het die wêreld se laste op sy skouers gedra. En daai oomblik toe hy daar lê,was ek happy vir hom. Want dít was Ivan: Hy wou die wêreld se probleme oplos.” Sy vee die trane tussendeur af.