Rugbywêreldbeker 2023
Om elkeen 70 (en meer) Springboktoetse aan te durf – waaronder in drie Wêreldbeker-rugbytoernooie – sit net in ’n plaasjapie se broek.
Boonop was daar was net een inkomtydreël op Jannie en Bismarck du Plessis se grootwordplaas naby Bethlehem in die Vrystaat – enige tyd solank hulle die volgende dag die melkery kan oopsluit en ’n voldag kan werk. Jannie (40), ’n dokter, sê dit is ál voorwaarde wat sy oorlede pa, Francois, vir hom, Bismarck (39) en hul jonger broer, Tabbie (Francois jr., 30), gehad het.
“Dit is ’n les wat my bygebly het. Dit maak nie saak wat ons gedoen het nie, ek het seker gemaak dat ek hard kan oefen en dat my werk op datum is.”
Jannie en Bismarck tel onder die min spelers wat in drie Wêreldbeker-toernooie kon uitdraf – 2007 in Frankryk, waar die Springbokke as wêreldkampioene gekroon is, 2011 in Nieu-Seeland en in 2015 in Engeland.
Verder was hulle in rugbyspanne wat byna elke belangrike toernooi op die aardbol gewen het – van die plaaslike Curriebeker tot die stryd teen die Britse en Ierse Leeus, die Wêreldbeker, die Drienasies en Europese toernooie.
Bismarck, ’n haker, het 79 keer vir die Springbokke uitgedraf en Jannie, ’n stut, 70 keer. Albei het ook in vier ander wedstryde vir die Bokke gespeel wat nie as toetse erken is nie. Jannie is in 2003 vir die SA onder 21-span gekies en Bismarck het in 2007 vir die span gespeel wat daardie jaar die