Wil jy ons van iets nuuts vertel? Stuur e-pos na nuus@tuis.co.za.
LIG JOU HOED
Paradysvoëls was die inspirasie vir Paradise Lights (van links: Sunset, Sunrise en Lagoon; R6 800 elk, arrangestudio.co.za), wat met trots in S.A. gemaak word. Elke skerm het ’n goue lagie binne-in vir ’n warm gloed wanneer jy dit aanskakel.
Pst!
Nou ook beskikbaaar in die nuwe Paradise Floor Lamp.
Luukse linne
Mungo se nuwe Terracotta-linne, wat in klein maat vervaardig word, spog met ’n ryk, aardse pigment wat telkens verander soos die lig daarop speel. Die kraakvars gevoel van pasgeweefde linne ontwikkel mettertyd tot ’n weelderige ingeleefde sagtheid. Ons is dol oor die Kamma Linen-duvetslope (vanaf R4 885, mungo.co.za)!
SIEN IS GLO!
Always Welcome by Kortmarkstraat 108, Kaapstad, beslaan twee vloere van ’n 18de-eeuse erfenisgebou en bring 40 van S.A. se voorste ontwerper-vervaardigers byeen. Verlustig jou in ’n indrukwekkende versameling meubels, beligting en huisware in gestileerde vertrekke waar ontluikende ateljees soos Neimil, Deft, Node en Ananta Studio skouers skuur met gevestigde skeppers soos Dokter and Misses, Houtlander, TheUrbanative, Kino en MashT Design Studio. Daar’s ook ’n geskenkwinkel met kleiner items van onder meer Skinny la Minx, House of Harhaz en Okra Candle. Sien alwayswelcome.store.
Skuif nader
Die Vuti Stoel met sy klein rugleuning (vanaf R5 950, woodbender.com) het ’n gesofistikeerde plekbesparende ontwerp wat jou toelaat om nader aan die toonbank in ’n tuiskroeg of kombuis te skuif.
MODE BETREE BINNE-ONTWERP
Die mode-ontwerper Jessica Molebatsi se Noluthandomateriaalreeks is ’n Afrika-toile geïnspireer deur haar veelrassige familie en liefde.