SOOS FAMILIE
Sy is ’n ou, gewaardeerde familievriendin. Maar julle is nie op voornaamterme nie. Nooit sal jy sommer sê: “Kan ek asseblief Ball’s kry?” nie. Nee, sy bly ’n stywerige “Mrs Ball’s”.
Die Engelse van toentertyd het mos so ’n formele klap weggehad. En Amelia Elizabeth Ball, wat dié op-die-bol blatjang op die mêp geplaas het, se ouers het kort tevore Brittanje se stof van hul voete geskud. ’n Skaars foto wys haar op reeds gevorderde leeftyd, grys hare strak agter haar kop vasgemaak, met digte wenkbroue bokant ’n swaar donkerraambril. Om haar nek is die stropsnoer wat sy altyd gedra het. Klein van postuur, maar selfgeldend, reguit, gewoond om haar sin te kry. Nié iemand wat twak van kabouters gevat het nie, vertel haar agterkleinseun Desmond Ball by monde van sy vrou, Diane. Hul woonplek in Glencairn is ’n hanetreetjie van Vishoek af, waar “Granny” Ball lank die septer oor huis en haard geswaai het. Die onbetwiste matriarg van ’n groot en hegte familie: Haar volwasse kinders het rondom haar in dieselfde straat laer getrek.
Dié vlytige vrou – die betekenis van haar naam in Latyn – het sewe kinders grootgemaak en terselfdertyd geboorte aan ’n produk gegee so eie aan ons land soos braaivleis en rugby. Dít in ’n tyd toe vroue as
