Rugbywêreldbeker 2023
Aanvanklik het sy liefde vir rugby swaarder geweeg – dit het gewys in sy vertonings op die veld en sy geesdrif vir die spel. Tog is boerdery in die oud-Springbokvleuel Ruan Combrinck (33) se bloed, want dit kom al van tot agt geslagte van sy pa, Cobus, én ma, Debbie, se kant. Vyf opeenvolgende geslagte, waaronder Ruan, boer al op die Combrincks se plaas, Uitzicht, van 2 000 ha by Babanango in KwaZulu-Natal. Nou boer hy ook heeltyds en is gaande daaroor.
Om ’n onderhoud met Ruan te kry, is byna onmoontlik. Hy is pal aan die werk, met beesgeluide op die agtergrond. Die enigste tyd wat hy kon inruim, is laat een wintersaand, kort nadat hy brandbane op sy doenlysie kon afmerk en vinnig ’n paar happe van sy aandete kon neem.
“Ek het jare lank eintlik ’n soort dubbele lewe gelei. Ek het ’n passie vir rugby gehad, maar tussen oefeninge saam met die Leeus het ek weggeglip om verskeie sakevennote in die vee- en wildbedryf te besoek. Op skool is ek dikwels uitgevang dat ek prentjies van rugbyballe of -pale teken, en denkbeeldige rugbyspanne opstel!”
Halfpad deur 2016 was daar genoeg tyd om langs die kantlyn te besin oor ’n toekoms buite ’n sport waarvoor hy geleef het. Ruan is ernstig beseer toe hy vir die Springbokke teen Argentinië gespeel het, slegs maande nadat sy
