Hulle kamp al baie lank met tente en het oor die jare al die toerusting vergaar wat ’n mens met hierdie leefstyl vereenselwig. Hulle het ook al elke denkbare slaapplan probeer: ’n verskeidenheid van tente, opblaasmatrasse, kampbeddens, skuimrubbermatrasse, duvets, slaapsakke… die lys het klaarblyklik nie einde nie. Dit was tyd vir ’n verandering, en daar was ’n idee – én genoeg tyd – om self iets te bou. Deon vertel.
Ek het al voorheen ’n Venter in ’n veeldoelige sleepwa vir ons gesin van vyf omskep. Hy het fietsrakke, ’n kombuis, watertenks, jerrykan- en gassilinderhouers en ammunisiekiste gehad. Ons het oral met daardie sleepwa gereis en baie goeie diens uit hom gekry.
Iewers in 2016 het die gedagte by my begin posvat om my eie wa te bou. Goeie vriende het in daardie tyd vir ons hulle teardrop-waentjie geleen en ons het hom met ’n Land Rover Defender gesleep wat ons by ’n ander goeie vriend geleen het. Ons het ons voertuie afgeskaal omdat ons in daardie tyd in Guangzhou, China, skoolgehou het.
Ons het twee van ons seuns Krugerwildtuin toe geneem met hierdie geleende kombinasie. Dit is al sedert die jare tagtig en negentig ons gunstelingvakansiebestemming, want my ouers het
