‘HOEKOM SAL EK MYSELF DEUR SO BAIE PYN EN LYDING SIT? HY WAS MY ALLES GEWEES’
WANNEER sy dorp toe gaan, voel sy hoe die oordeel dik in die lug hang.
“Mense kryt my uit as ’n moordenaar,” vertel die jong vrou hier in die kuierhoekie van die huis op Brits waar daar eens so baie gelag is.
“As ek inkopies in die dorp gaan doen, kan ek voel hoe mense na my staar. Ek wens net hulle kan besef dit was regtig net ’n fratsongeluk.”
Dis ’n oomblik wat Megen Kloppers (25) oor en oor in haar nagmerries herleef.
Die ligte skop van die .22-geweer teen haar skouer, die knal van die skoot. Dan haar man se woorde: “Ag, nee, Lovie, jy het my raakgeskiet…”
Sy het eers gedink hy maak ’n grap, maar toe sak hy ineen.
“Ek het koud geword en die geweer neergegooi,” vertel sy en begin ontroosbaar huil.
Die jong ma praat vandag eksklusief met Huisgenoot oor die skietdood van haar man, Freek (31), wat soveel opspraak verwek het.
Megen hou vol sy dood op 6