1 Stap tussen die diere
Te voet. Net soos die renosters, sebras en sekretarisvoëls. En die goggas en geitjies. Die beste manier om die Kruger te leer ken is om deur die veld te stap – dae lank aaneen. Só voel jy die droë grasse teen jou bene piets en rus jy in die middel van die dag in die skaduwee van bome. Kyk maar, die diere doen dieselfde oor die middaguur.
Jy raak vertroud met die golwing van die landskap, die loop van die riviere, soms drink jy water uit skepgate wat olifante uitgedolwe het in rivierbeddings. Jy stap saam met twee gidse, dra alles wat jy nodig het en oornag in die veld.
Waarskynlik dié grootste stap-avontuur wat jy in die park kan beleef, is die Kruger Trail. Die roete strek van Pafuri aan die bopunt van die park tot by die Malelane-ruskamp in die suide – ’n yslike 650 km! Toemaar, jy stap dit nie in een skof nie, maar in ses skofte oor drie jaar. Dié roete is eksklusief en verg beplanning en toewyding. ’n Skof vat ses dae (vyf nagte) om te voltooi – sien kassie hiernaas.
Die rugsakroetes (Mphongolo-, Lonely Bull- en) is soortgelyk aan ’n Kruger Trail-skof, maar strek oor net vier dae en drie nagte (vanaf R3 100 p.p.).
