DIE gehoor klap gemoedelik hande al is die volgende komponis en sy werk waarskynlik nog aan baie van hulle onbekend.
Dis nie elke dag dat jy die voorreg het om ’n wêreldpremière te hoor nie – veral nie hier op die kampus van die Noordwes-Universiteit in Potchefstroom nie.
Op die verhoog lig die musiekdosent en dirigent André Oosthuizen sy stokkie. Vir ’n oomblik kan jy ’n speld hoor val, en dan voer die 60 musikante jou weg na ’n ander wêreld.
Dis asof jy die dreunende hoewe van ’n ridder se strydros hoor terwyl geheimsinnige woudtonele oor ’n reuseskerm agter die NWU-simfonieorkes verbyskuif. Eers agt minute later, toe die laaste klanke van Tema di un cavaliere wegsterf, keer die gehoor van 900 mense terug tot die hede.