ONS MEE LMAN
Toe hy in 2013 ’n meul koop, het Aubrey Terblanche nog niks geweet van die meelbedryf nie. Maar danksy die storie van Gideon in die Bybel en ’n groot sprong in geloof het dié korporatiewe vlieënier die nismark van steengemaalde meel betree. Vandag is hy ’n suksesvolle meuleienaar. Ons gesels met hom by Gideon Milling se hooffabriek in Bellville oor sy passie vir meel
1 Hoekom moet ons steengemaalde meel kies?
Baie tuisbakkers verkies dit bo gewone kommersiële meel omdat hulle glo dit lewer ’n beter bakproduk. Steengemaalde meel word stadig by ’n laer temperatuur – 38-40 °C – gemaal, wat help dat die koringkiem sy voedingswaarde behou.
Dit is ook ’n growwer, meer verteerbare meel. Verbruikers het al aan my gerapporteer dat hulle, ondanks hul glutenintoleransie, geen negatiewe effek van ons meel het nie.
2 Hoe het jy in die meelbedryf beland?
Soos die jare van jou lewe aanstap, begin jy jouself afvra: “Waarom is ek hier? Wat is die doel van my lewe?” Ek wou nie een van daardie mense wees wat net hier rondhang nie, ek wou iets dóén. Ek het gevoel ek kan ’n verskil in die voedselbedryf maak en in die meelbedryf beland. Ek het niks geweet van die bedryf nie, net ervaar die Here sê: “Begin die besigheid en Ek sal die storie verder skryf.”
3 Waar kom die naam Gideon Milling vandaan?
Ek het op ’n dag in Rigters 6 die storie van Gideon gelees waar hy koring dors terwyl hy vir die Midianiete wegkruip. ’n Engel het aan hom verskyn en gesê: “Die Here
