GELDSAKE
Die dae toe jy met selfvertroue 'n groot trollie in die winkel kon gryp om hom tot bo met groceries te vul, is verby. Deesdae loop jy met net 'n mandjie as jy kos koop en as dit by betaal kom, rek jou oë pieringgroot oor hoe duur net daai paar goedjies in die mandjie kos!
Daar is 'n hele klomp redes hoekom als net ál duurder word: Inflasie, Covid-19 wat globale verskeping en verspreiding van goedere opgedinges het, loadshedding wat besighede se kostes opstoot, en die swak rand wat die petrolprys die hoogte laat inskiet – wat op sy beurt weer kospryse opstoot.
Kosprysinflasie het onlangs tot 13,6% gestyg – die hoogste styging in 14 jaar. Volgens die Buro vir Marknavorsing gaan kospryse in die land vir nog omtrent die volgende twee jaar baie hoog bly. Eers in 2025 behoort daar effense verligting te wees weens 'n verbetering in ekonomiese vooruitsigte.
