STELLA MURDERS
DIE WARE GEBEURE
Stella Murders ondersoek die dood van die beste vriendinne Sharnelle Hough (17) en Marna Engelbrecht (16) in die skoolkoshuis van die Hoërskool Stella in Noordwes.
Op Saterdagoggend 26 Mei 2018 is Sharnelle dood aan die trapreling gevind en Marna is in ’n badkamer ontdek – albei sterftes het aanvanklik soos selfmoord gelyk.
Stella, die tuiste van net meer as 4 000 mense, is ’n klein, stil beesboerderydorpie naby Vryburg in Noordwes. “In so ’n hegte gemeenskap word verwag dat gevaar van buite af kom,” sê die kliniese sielkundige Elmarie Claassens in die dokumentêr. “Maar die ding van gevaar is: Dit kom nie uitsluitlik van buite nie.”
In 2021 het Showmax se dokkiereeks die land aan die praat gehad, en nou is dié reeks se regisseur en produksiemaatskappy terug met ’n nuwe aangrypende dokumentêr wat gaan oor die sterftes by die Hoërskool Stella.