Dit klink dalk nie na baie om op 55 hektaar met vrugte te boer nie – veral nie vir iemand wat op 200 hektaar boer nie – maar vir mnr. Mario du Plessis is dit groot én klein genoeg. Hy kan sy oog oor die kleinste besonderhede hou, en terselfdertyd ’n bevredigende winspersentasie handhaaf.
Om oral te kan wees en by alles op die plaas betrokke te wees, is hoe Mario dit verkies. Hy boer op Aurora in die Warm Bokkeveld buite Ceres met 39 ha pere, 10 ha appels en 7 ha perskes. Hy saai ook sowat 200 ha koring, 40 ha hawer en 25 ha weidings. Sy vleisbeesvertakkings (Angus en Bonsmara) is sowat 50 tot 60 sterk.
“Ek hou nie van ’n rompslomp-besigheid nie. Ek sal nie só groot wil gaan dat ek nie my hand op iets kan hou nie.”
Die Aurora-boerdery is op die prysuitdeling van Ceres Fruit Growers (CFG) einde verlede jaar bekroon met die gesogte CFG-voorsitterstrofee, asook die trofeë vir beste Rosemarie-pere, beste Panorama Golden-appels, beste oesskatting en beste inkomste per hektaar vir pere.
“My ouers het ook al bekers vir Rosemarie- en Bon Chretien-pere gewen, maar die afgelope vier jaar word ons deurgaans beloon. Verlede jaar het ons die heel grootste beker (die Voorsitterstrofee) gekry, maar dis
