DIE afwagting is hoog onder die groep 2022-matrieks op die trap van Helpmekaar Kollege in Johannesburg – die oomblik is op hande.
Party weet hulle het geslaag, maar hou duim vas vir ekstra goeie punte. Aan ander knaag die senuwees.
Onder die twyfelaars is Alex Nortjé. Op 20 is hy twee jaar ouer as sy klasmaats. Hy moes gr. 1 en gr. 8 herhaal weens ’n reeks gebeure in sy jong lewe.
Teen sy 15de verjaardag het sy pa, ma en ouer broer al drie in afsonderlike voorvalle hul eie lewe geneem. Op hoërskool was die skoolkoshuis weekdae sy tuiste; naweke die Abraham Kriel-kinderhuis. Sy toekoms het ná die gebeure donker gelyk – tot die dag dat hy besluit het om die foon op te tel en hulp te vra om sy lewe op koers te kry.
