Nice is geleë aan die Côte d’Azur, oftewel Franse Riviera. ’n Antieke stad met tipies Franse argitektuur en die blouste blou see. Die koskultuur is ’n mengelmoes van tradisionele Franse smake met sterk Italiaanse invloede vanweë die stad se ligging naby die grens met Italië. Nice is om presies te wees 11 221,5 km van Middelburg af, so Suid-Afrikaanse kos sal jy moeilik hier vind.
Sodra jy jou voete in Nice sit, sal almal dadelik vir jou sê jy moet seker maak jy eet pissaladière – ’n tradisionele platbrood, amper soos pizza, maar gelaai met gekaramelliseerde uie, swart olywe en ansjovis. Jou eerste gedagte is waarom sou Jan Hendrik juis hiér ’n restaurant oopmaak wat Suid-Afrikaanse kos bedien. Kom ons wees eerlik: ’n Mengsel van uie, olywe en ansjovis is baie ver verwyderd van hoe ons in Suid-Afrika eet.
Tog het hierdie Afrikaanse plaasseun van Middelburg daarin geslaag om in ’n agterstraatjie van Nice ’n restaurant te begin wat die wêreld aan die praat gekry het – iets waaraan hy lank beplan het. Hy het eens op die seiljagte van die rykes van Monaco gewerk en sou dan gereeld Nice besoek. “Ek het lank gesoek na die perfekte perseel waar ek JAN kon begin. Toe ek die gebou sien waar JAN tans staan, het ek geweet dis die plek; jy weet net so iets