Dag 1: Harare – Karoi – Magunje – Gache Gache
Dit was wonderlik om uiteindelik aan die gang te kom. Hierdie was een van die langste dae op ons reisplan, maar dit was nodig aangesien ons gretig was om die Zambezivallei te bereik en ons veldry-avontuur te begin. Ons roete het 55km se teer vanaf Magunje ingesluit. Alhoewel die pad in ‘n redelike goeie toestand was tot by Gache Gache, was daar ‘n paar baie slegte dele. ‘n Mens moet veral versigtig wees as jy ‘n waentjie sleep en op die uitkyk wees vir motorfietse en voertuie wat uit die vallei uit aankom.
Ons het 'n heerlike aand by 'n wonderlike kampplek deurgebring. Die geriewe moet nog voltooi word, maar die warm storte en spoeltoilette wat daar reeds is was eersteklas.
Dag 2: Gache Gache – Kariba – Matusadona (Kanjedza via Fothergill-eiland)
Na ‘n stewige ontbyt het ons ons gashere gegroet en die 62km-rit om die oostelike kom van die Karibameer tot by Chawara-hawe aangepak. Dit was voorwaar verfrissend om te sien dat daar nuwe winkels in Kariba is wat in die behoeftes van oorlanders
