Wonderwerke is moontlik en ou liefde roes nooit nie. Dít glo Leonard. Dis veral waaraan hy die afgelope vyf jaar klou. Vandag is sy en Felicia se dertigste huweliksherdenking. Die vyfde jaar sedert haar siekte. Drie weke sedert sy diagnose.
Leonard staan voor die spieël, besig om sy swart das te strik. Dieselfde een met sy wit hemp en swart baadjie daarby wat hy dertig jaar gelede aangetrek het. Hy knoop dit met moeite vas. Die artritis takel sy gewrigte nou al vir 'n hele paar jaar.
Leonard kyk verlig op na sy beeld in die spieël. Sy pak pas nog amper dieselfde as destyds. Hy trek die kam met moeite deur sy hare. Wat eens 'n swart boskasie was, is nou valerige slierte. Leonard sit die kam op die kassie neer en tel sy bril op. Hy vee die bril se dik lense met 'n lappie skoon. Hy lyk dalk nie meer