HY IS vandag een van ’n uitgesoekte groepie supersterre in die balletwêreld en het al op wêreldverhoë klassieke rolle gedans, soos dié van Siegfried in Swanemeer en die Blou Voël in Die skone slaap ster. Maar net 12 jaar tevore was Siphesihle November nog ’n onbekende pikkie met sterre in sy oë in ’n township buite Montagu.
Siphe was net 11 jaar oud toe weldoeners hom gehelp het om in Kanada ballet te gaan studeer, en in die jare wat gevolg het, het hy hom opgewerk tot die indrukwekkende posisie van primo ballerino (meesterdanser) in die National Ballet of Canada.
Nou onlangs kon Suid-Afrikaners weer sy suksesverhaal vier toe hulle die eerste keer ’n geleentheid gehad het om te gaan kyk hoe Siphe hier in dans – sy eerste optrede in Suid-Afrika sedert hy ’n wêreldster geword het.