HY HET LANGER AS ENIGE BRITSE TROONOPVOLGER VOOR HOM GEWAG. GEEN MENS WAG SO LANK VERGEEFS NIE
’N VAALJAPIE met bakore. ’n Ou snob wat hom in sy paleise met eksentrieke stokperdjies ophou. ’n Koudbloedige man wat sy eerste vrou en sy jongste seun van hom vervreem het.
Oor die jare is prins Charles van Engeland, nou koning Charles III, op allerlei maniere – meestal onvleiend – beskryf. Trouens, in die 70 jaar dat Charles eerste in die lyn was om sy ma, Elizabeth II, as Britse monarg op te volg het hy soveel negatiewe gevoelens onder sommige sektore van die publiek laat opwel dat party mense bespiegel het hy sal nooit koning word nie.
Veral die ineenstorting van sy huwelik met prinses Diana het hom diep ongewild gemaak. Hoewel dit later sou blyk hy was nie al een in dié huwelik wat aan die verkeerde kant van die laken rondgevry het nie, het die publiek hom wyd beskou as die een wat met sy wreedheid teenoor die sensitiewe “People’s Princess” hul huwelik op die rotse gedryf het.
Daarbenewens is dit ook lankal bekend dat hy nogal vreemd kan optree. Nie net praat Charles met plante en bome nie; hy luister glo ook na hulle.
Én dan is hy blykbaar ’n bedorwe man wat soms oorkom asof hy dink hy is te goed vir hierdie wêreld. Wanneer Charles op
