BOTOKS, DEUR DIK EN DUN: ALLES WAT JY MOET WEET
DIT is genoeg om selfs ’n gesonde selfbeeld ’n knou te gee. Jy sien foto op foto van die een of ander bekende met ’n seepgladde vel en stralende gelaat – net om dan te besef dié bekende is eintlik jare ouer as jy – en dít terwyl ’n verskeidenheid gesigplooie soggens vanuit jou spieël na jou terugstaar.
Die geheim? Buiten ’n peperduur velsorgroetine en ’n span grimeerkunstenaars wat altyd regstaan, is die antwoord waarskynlik botoks.
Maar terwyl die eerste twee jou dalk nie beskore is nie, is dié wonderinspuitings lankal nie meer net vir Hollywoodsterre nie. Trouens, dit is die algemeenste kosmetiese behandeling wat vandag gedoen word.
Wik en weeg jy oor of jy dit moet waag? Kyk wat sê die kenners.
