BRIEWE OP MY TROUROK
MEER as drie dekades gelede moes hul romanse ’n digbewaarde geheim bly, nes die liefdesbriewe wat sy deur die jare gehou en diep weggebêre het.
Maar vandag kan Lynette Francis-Puren haar hart letterlik op haar mou dra, want aanhalings uit daardie einste briewe is in ougoud op haar trourok van naaswit satyn gedruk.
Die bekende joernalis, omroeper en TV-aanbieder straal in die skepping wat die storie van haar en Ashley Puren se eens verbode liefde vertel toe sy haar bruidegom op die maat van vioolklanke tegemoetstap. Hy wag haar in onder ’n Joodse chuppah buite die Suikerbossierestaurant met sy prentjiemooi uitsig oor Houtbaai.
Dit is die tweede keer dat Lynette (52) en Ashley (51) ewige trou aan mekaar beloof, want presies twee jaar gelede – op 20 Maart 2020 – is hulle in Kampsbaai, Kaapstad, voor ’n huweliksbevestiger getroud, met net twee goeie vriende as getuies. Hulle het dié intieme weglooptroue inderhaas gereël toe die pandemie en streng inperking hul planne vir ’n sprokiestroue later daardie maand in die wiele gery het.
Vandag, op hul tweede huweliksviering, kan hulle eindelik hul droomtroue hou nadat die troudatum vier keer weens die virus en sy variante uitgestel moes word. Die viering saam met
