‘DIEF’ VAN R4 M. IN ’N TROLLIE: WAAR IS DIE GELD DAN HEEN?
MET die eerste oogopslag is daar min wat die huisie in Soweto van baie ander onderskei. Dis klein en beskeie; die werf bedek met ’n netjiese sementblad. Dieselfde onopgesmukte waardigheid straal uit die vrou wat jou by die voordeur verwelkom.
Vangile Dlamini (82) is duidelik trots op die huis waar sy sedert 1973 woon. Deur die jare het sy dit stuk-stuk verbeter wanneer sy ’n geldjie kon afknyp, verduidelik sy: die sementblad pleks van die oorspronklike stowwerige werf, ’n grensmuur … Ook binne is haar woning keurig versier met die hulp van die kleinkinders wat sy hier grootgemaak het.
