IN ANDER SE SKOENE
DIT was ’n oomblik saam met haar pa wat die aktrise Nicole Fortuin tot vandag toe bybly.
Sy was 10, 11 of dalk 12 – dít kan sy nie meer presies onthou nie – toe sy saam met haar pa die stadsbiblioteek in Johannesburg se middestad besoek het.
Hy was toe – soos nou – as direkteur betrokke by die biblioteekdiens, en die twee het saam op die dak van die biblioteek gaan staan; hoog bo die gedreun van die Goudstad. Talle mense het ver onder hulle in die strate gestap, haastig om by hul bestemming uit te kom – onwetend dat ’n pa en sy dogter van hoog bo op hulle neerkyk.
