GEREED VIR ONS GROOTSTE ROLLE NOG
MET SY baard, breë glimlag en vonkelende oë het hy vroue reg oor die land laat swymel in die rol wat hom alombekend gemaak het. Die rol van die boerseun Hugo Derks in Huisgenoot se fliek Vergeet my nie was gemáák vir die akteur Sean-Marco Vorster. Maar nou staan hy reg vir die grootste rol van sy lewe – dié van pa.
Hy droom al van kleins af hieroor, vertel ’n stralende Sean-Marco (29) vandag. ’n Klein mensie wat hom naboots en mettertyd sy of haar eie persoonlikheid sal kry. Iemand wat kan groot droom en, nes hy as kind, kaalvoet in die modder sal kan baljaar.
“Ek wou nog altyd ’n pa wees, en ek het my altyd verbeel ek gaan ’n dogtertjie-pa wees, en kyk nou net … Ons verwag ’n dogtertjie!” verklap die akteur en glimlag vir sy verloofde, die Legacy-aktrise Jay Anstey (30).
Toe hulle se fotosessie saam onder die bloeisels van ’n honderd jaar oue pruimboom poseer, sukkel die verliefde paartjie om hul hande van mekaar af te hou – die aantreklike akteur en sy pragtige donkerkopnooi, nou in die derde trimester van haar swangerskap.
