“Ja, jou kind sal val wanneer hy begin fietsry. Maar hy gaan leer hy kan weer opstaan – en hy gaan leer ry.”
Kanse waag is belangrik vir jou kind se grootword –al laat dit jou hart in jou keel klop as hy iets doen waarmee hy dalk kan seerkry.
Maar as jou kind waag en verken, leer hy sy eie grense en vermoëns ken, sê Naomi van Wyk, ’n Stellenbosse ma, kliniese sielkundige en die skrywer van Veilig en vreesloos.
“Dit skep vir hom die geleentheid om te voel hy kan sy omgewing bemeester. Dit lei weer tot selfvertroue en waagmoed.
“Kinders wat nooit kans kry om te waag nie, begin dink die wêreld is ’n gevaarlike plek en dat daar baie dinge is wat hulle nie kan doen nie. Dit laat hulle angstig en verlam voel, sodat hulle nie meer wil probeer nie ‘want ek weet ek kan nie’,” verduidelik Naomi.
1 BRAAI SELF MALVALEKKERS
Dis pure plesier en so tussen die lekker deur leer jou kind dat ’n vuur warm is, dat