Die sleutels tot die paradys
“Ce sont les clés du para-dis.” (Hierdie is die sleutels tot die paradys.) Hertogin Marie Helene Angelique Sophie Eugenie Saint Gal de Seigner staan met haar voete dig teenaan mekaar in die voorportaal van La Creuzette. Haar swart Christian Louboutin-hofskoene is vlekkeloos, ten spyte van die silwer waterplasse wat oral in die tuin opdam ná ’n onverwagse lou herfsreën. Die water glim somber op die antieke blou teëlvloer.
Haar tweestuk is die kleur van ’n vroegoggendse hemel, grou, maar nie kil nie, en onmiskenbaar Chanel. Die tekstuur van die materiaal het effens veryl ná jare se afborsel en
