Simbole wat swaarde word
Enkele jare gelede het my klerk by die konstitusionele hof, ’n Tswanasprekende nooi Seleseng, besluit om met ’n Boerseun genaamd Labuschagne te trou. Ek moes hulle trou, toga en al, in my huis. Die atmosfeer was merkwaardig. My vrou was gasvry; die bruid in beheer; bruidegom senuweeagtig; sy broer bedruk; skoonsuster geselserig; ma doodstil. Pa Seleseng, ’n moruti, het mooi gebid. Toe ek sê dat die huwelik soms moeilik is en harde werk vereis, antwoord stiefpa oom Kobus met enkele eenvoudige woorde: Dit hoef glad nie so te wees nie – so-lank daar net liefde is.
Sonder spraakvryheid sterf jou menswees.
Die bruidegom het self ’n aangrypende verhaal: Twee dae ná Lappies se tiende verjaardag, op die dag wat sy partytjie sou plaasvind, laat regses ’n bom ontplof
