LEWE IN VOLKLEUR
Miskien was hy in Marokko toe hy gesê het, ‘Kleur is ’n krag wat ’n direkte uitwerking op die siel het…’ Dís hoe ek gevoel het, nét soos die Russies gebore kunstenaar en kunsteoretikus Wassily Kandinsky dit so mooi opgesom het.
Twee jaar gelede begeester Marokko se geure en veral kleure my toe ek en ’n vriendin hierdie Moslemland drie weke lank deurkruis. Dit is asof daar ’n goue lig opgaan toe ons die Noord-Afrikaanse land invaar. Ons bring ook twee dae deur in die Sahara, op ’n kameel se rug, skommel-skommel, betower deur die rooibruin duine, die son wat goudgeel sak, die bloupers aand wat oorvloei in ’n inkswart nag, met die sterre en maan silwer daarbo.
Dit word duidelik hoekom hierdie volk al eeue lank die verruklikste tapyte, keramiekkuns en piouterware optower. Hoe dan anders? Die kleure nooi hulle om te skep. Die stad Chefchaouen, ook
