Kajuit in wolke se elegante waardin
Jy sien haar daar staan, 64 jaar gelede op die ou Jan Smuts-lughawe, neus teen die groot glasvenster, in vervoering oor die lugwaardinne wat van die Oranje Sterte afklim en op spykerhake aangeklik-klak kom in hul hemelblou uniforms, byekorfhare, wit handskoene en wapperende serpe.
Skaars vyf jaar oud, het Marion Fernandes van Benoni geweet sy soek die killer heels, die halwe vlerkie teen haar bors, en die glans. Veral die glans.
Toe Marion verlede Julie afgetree het ná ’n ononderbroke loopbaan van 50 jaar as lugwaardin, was dit as die koningin van die passasierskajuit.
Slegs enkele lugwaardinne wêreldwyd kon haar dit nadoen, en met die huidige intree-ouderdom van 21 en aftrede op 60, sal daardie rekord seker vir altyd staan.
Op 68 is Marion, met haar warm persoonlikheid, steeds pure elegansie en grasie, nie ’n haartjie uit plek nie.
Sy was nie verniet Pik Botha se gunsteling-lugwaardin nie. PW Botha het haar vermy oor sy Engels is, en toe Nelson Mandela ingehuldig is, was sy die
