Lekka lekka kook vir kinders
Baie van ons het pragtige herinneringe waar ons saam met ons ma’s of oumas in die kombuis gekook of gebak het. Ek onthou so goed hoe my ma my leer skilferkors maak het. Die aanmaak van die deeg, die rasper van die botter, die vou van die deeg, platslaan met ’n koekroller, in die yskas laat rus en dan weer botter, weer slaan, weer yskas toe – totdat al die botter klaar is. Ek het nie besef wat ek alles geleer het nie: Ek het geleer om af te meet, om te tel, om te deel.
