NUWE DINGE
SLAAP SAG
As jy hou van doeks tussen luukse bedlinne – wie dan nou nie?! – is Biggie Best jou volgende stop. Hulle nuutste lentereekse is nou beskikbaar, in draadtellings van 300 tot 600 en in Egiptiese katoen. Ons hou veral van die Washed Cottonduvetstelle, vanaf R1 300 vir dubbelbedgrootte met twee kussingslope. Besoek jou naaste Biggie Best-winkel, of gaan na biggiebest.co.za om joune aanlyn te bestel.
’N PLESIER, MY DIER
Dis nie net ons wat goeie ontwerp kan waardeer nie. Jou kiets gaan hierdie krappale van soliede eikehout en sisaltou gate uit geniet. Die plaaslike meubelontwerper Birba het dit spesiaal vir katte gemaak, mooi genoeg om deel uit te maak van jou dekor. Die Ruby Cat Scratcher (links) kos R3 200 en die Franc Cat Scratcher Side Table R2 700. Bestel dit aanlyn by birba.co.za – aflewering is gratis.
LEKKERRUIK-OLIE
As daar nou een Franse kultusproduk is waarmee Britse vroue tans hulle kaste volstop voordat Brexit dit dalk van die rakke af laat verdwyn, is dit Nuxe Huile Prodigieuse, ’n topverkoper-skoonheidsproduk in Frankryk met ’n wêreldwye aanhang sedert 1991.
