PLAAS-PLAAS
Suid-Afrika het oor die laaste paar maande ’n nuwe gesig leer ken in die derde seisoen van die kookprogram Kokkedoor. Die kunstenaarkosliefhebber Lientjie Wessels se besonderse geurkombinasies het die beoordelaars twee keer laat proe. Haar kookboek, Geure (uitgegee deur Annake Müller Publishing), is boonop vanaf middel November op die rak om ons almal te leer kook met kreatiwiteit en geur.
’n Opgeleide sjef is sy egter nie. ‘Ek het ná skool kuns gestudeer, maar net toe ek met my meestersgraad begin, is my pa dood en ek moes inspring om my ma te help. Ek het die dekorwinkel Lemon Lounge in Hatfield in Pretoria oopgemaak. Ons is later Brooklyn Mall toe en ek is nie seker of ons net te vinnig gegroei het en of ek nie mooi verstaan het wat ek doen nie, maar toe ek die winkel toemaak, het ek begin
