’N KULTUUR VAN KRAG
“Ons mense het ’n geweldige kapasiteit vir blydskap wat ons toelaat om onder die swaarste omstandighede iets te vind om oor te lag,” sê Jerome Rex (38).
Sy album, Al Jerome, is vanjaar met ’n Ghoema-toekenning vir die beste Afrikaanse hip-hop-album bekroon.
“Uit blydskap spruit menslikheid; daardie vermoë om mekaar met deernis te behandel en nie net bloot die lewe vanuit ’n oor-lewingsperspektief te benader nie. Wanneer ons na meer as ons eie belange omsien, verander dit ons harte en ontdek ons dat die lewe om meer as net onsself draai.”
Jerome, wat in Kaapstad in die skadu van Tafelberg gebore is, sy kinderjare in Elsiesrivier op die Kaapse Vlakte deurgebring het en daarna in Kuilsrivier grootgeword het, waar hy steeds woon, het ’n kwalifikasie in opleiding en ontwikkeling en ’n diploma in teologie verwerf. Hy beoefen steeds ’n heeltydse beroep as fasiliteerder in die skryf en ontwerp van studiemateriaal.
Hy en sy vrou, Adéle, is al 14 jaar getroud. Hulle het twee dogters, Eden (11) en
