DIE REISENDE KARNAVAL
“Ek is bly die slang het uit daardie mandjie weggekom,” sê Suzi. Soos dit ’n aktivis betaam, steek sy haar vuis in die lug.
Ciryllene kom uit die spens uit, haar gesig op ’n plooi. “Dit kom daarvan as jy truuks met adders probeer uithaal.”
Melinda skuif die bak met versiersuiker eenkant toe en vee haar hande aan haar voorskoot af. “Dalk is sy gifkliere wel verwyder. Ons moet vasstel of dit so is.”
’n Vermoede skiet haar te binne en sy kyk Suzi beskuldigend aan: “Dis jý wat dit gedoen het, is dit nie? Jy het die flippen slang vrygelaat!”
“Dink jy ek is so kinderagtig?” Suzi se oë vlam.
Yolandi staan op. “Met jou weet mens nooit. Aktiviste gaan soms op hol met ’n ding.” Sy gaan was haar hande. “Ek gaan plein toe, ek gaan kyk wat daar aangaan.
